26 июлдә республиканың юғары уҡыу йорттарында документтар ҡабул итеү тамамлана

ӨФӨ, 2017 йыл, 26 июль. /«Башинформ» мәғлүмәт агентлығы, Эльмира Сабирова/. 26 июль — берҙәм дәүләт имтиханы һөҙөмтәләре буйынса ғына юғары уҡыу йортона инеүсе абитуриенттар өсөн документтар ҡабул итеүҙең һуңғы көнө. 27 июлдә вуздар үҙҙәренең рәсми сайттарында һәм мәғлүмәт стендтарында уҡырға ингәндәрҙең исемлеген, һәр һынау һәм шәхси ҡаҙаныштар өсөн балдар һанын баҫтырып сығара. Һынауһыҙ уҡырға инеүселәр өсөн ҡабул итеүҙең нигеҙе һәм шәхси ҡаҙаныштар өсөн балдар һаны күрһәтелергә тейеш. Шулай уҡ исемлектә абитуриенттарҙың өҫтөнлөклө хоҡуҡҡа эйә булыуы күрһәтелә, тип аңлатма бирә Рособрнадзорҙың матбуғат хеҙмәте.

Бынан һуң һынауһыҙ һәм квота сиктәрендә уҡырға ингән абитуриенттарҙы ҡабул итеү башлана.

28 июлдә ике йәки унан күберәк вузға ғариза биргән айырым хоҡуҡҡа эйә абитуриенттарҙан һәм маҡсатлы ҡабул итеү квоталары сиктәрендә уҡырға инеүселәрҙән алыныуға ризалыҡ тураһында ғаризалар ҡабул итеү тамамлана.

Артабан дөйөм конкурс буйынса уҡырға инеүсе абитуриенттарҙы ҡабул итеүҙең тәүге этабы башлана.