Ҡырмыҫҡалы районында социаль хәүефле төркөмгә ҡараған үҫмерҙәр өсөн «Заря» беренсе хәрби-тарихи лагеры асылды

ӨФӨ, 2017 йыл, 21 июль. /«Башинформ» мәғлүмәт агентлығы, Гөлфиә Акулова/. Ҡырмыҫҡалы районындағы «Виктория» балалар спорт-һауыҡтырыу лагерында социаль хәүефле төркөмгә ҡараған үҫмерҙәр өсөн «Заря» беренсе хәрби-тарихи лагеры асылды, тип хәбәр Өфө хакимиәте. Лагерҙы ойоштороусылар — Рәсәй хәрби-тарихи ойошмаһы менән берлектә ҡаланың Йәштәргә патриотик тәрбиә биреү үҙәге, баш ҡала хакимиәтенең Йәштәр эштәре буйынса комитеты.

Ике аҙна буйына лагерҙағы 12-17 йәшлек 120 тәрбиәләнеүсе илебеҙҙең хәрби тарихын өйрәнәсәк, лекциялар тыңлаясаҡ, тематик документаль һәм нәфис фильмдар ҡараясаҡ, хәрби хәрәкәттәрҙә ҡатнашыусылар менән осрашасаҡ. Шулай уҡ көн һайын төрлө мәҙәни һәм спорт сараларын уҙғарыу ҡаралған. Тәрбиәләнеүселәр дүрт взводҡа бүленгән, иң кеселәр — «Крап береттары», өлкәндәр — «Диңгеҙ пехотасылары», урта төркөм — «Десантсылар» һәм «Сик буйы һаҡсылары».