Төбәктә «Таҙа Ыҡ» экологик акцияһына йомғаҡ яһалды

ӨФӨ, 2017 йыл, 19 июль. /«Башинформ» мәғлүмәт агентлығы, Әлим Фәйезов/. Туймазы районында «Таҙа Ыҡ» социаль-экологик акцияһы тирә-яҡ мөхитте яҡлауға йүнәлтелгән әһәмиәтле проекттарҙың береһе булды. Сара ай буйына дауам итте. Уҡыусылар, студенттар, йәштәр йәмәғәт ойошмалары, «Экология-Т» һәм «Дорстрой» торлаҡ-коммуналь хужалыҡ предприятиелары вәкилдәре акцияла әүҙем ҡатнашты. Илсембәт һәм Ҡарат ауыл биләмәләре лә саранан ситтә ҡалманы: Ыҡ йылғаһы тамағын һәм тирә-йүнде ҡаты көнкүреш ҡалдыҡтарынан таҙартты. Бишбүләк районынан килгән экологтар ҙа ошо эшкә үҙ өлөшөн индерҙе.

Акцияла бөтәһе 650-нән ашыу кеше ҡатнашты. Ирекмәндәр һәм битараф булмаған кешеләр меңдән күберәк тоҡ ҡаты көнкүреш ҡалдыҡтары йыйҙы, тип хәбәр иттеләр муниципалитет хакимиәтендә.