Өфөлә Башҡортостандың иң яҡшы умартасыһы билдәләнәсәк

ӨФӨ, 2017 йыл, 13 июль. /«Башинформ» мәғлүмәт агентлығы, Гөлфиә Акулова/. Өфөлә Башҡортостандың иң яҡшы умартасыһын билдәләйәсәктәр. «Иң яҡшы умартасы» номинацияһында «Һөнәре буйынса иң яҡшы» республика профессиональ оҫталыҡ конкурсы 14 июлдә Өфөнөң «Аҡбуҙат» ипподромы майҙансығында үтә. Ойоштороусылары – Башҡортостан Ауыл хужалығы министрлығы һәм Башҡортостандың Умартасылыҡ һәм апитерапия буйынса ғилми-тикшеренеү үҙәге.

Оҡшаш район һәм ҡала ярыштарында беренсе урын яулаусы умартасылар конкурстың ҡатнашыусылары була ала. Ярыш теоретик белемде һәм практик оҫталыҡты тикшереүҙе үҙ эсенә алған ике этаптан торасаҡ.

Төбәк конкурсында еңеүсе 15-17 августа Өфөлә үтәсәк «Һөнәре буйынса иң яҡшы» бөтә Рәсәй профессиональ оҫталыҡ конкурсының федераль этабында ҡатнашасаҡ. Бөтә Рәсәй конкурсында ҡатнашыуҙары тураһында Ҡырым, Татарстан республикалары, Тула өлкәһе, Байкал аръяғы умартасылары белдергән.

Конкурстың төп бурысы – эштең етештереү һөҙөмтәлелеген һәм сифатын арттырыуған тәьҫир иткән умартасылыҡтың алдынғы хеҙмәт алымдарын асыҡлау һәм пропагандалау; умартасыларҙың һөнәри оҫталығын, уларҙың теоретик белемен һәм практик оҫталығын камиллаштырыу; республикалағы урындағы халыҡтың традицион кәсебен популярлаштырыу.