Республика юғары уҡыу йорттарының береһе Яндекста вуздарҙы эҙләү рейтингында тәүге 20 иҫәбенә инде

ӨФӨ, 2017 йыл, 12 июль. /«Башинформ» мәғлүмәт агентлығы, Эльмира Сабирова/. Республика юғары уҡыу йорттарының береһе Яндекста вуздарҙы эҙләү рейтингында тәүге 20 иҫәбенә инде

Башҡорт дәүләт университеты «Яндекс» компанияһының интернет ҡулланыусылары һорауҙары буйынса вуздарҙы эҙләү рейтингында 20-се баҫҡысты биләне. 2016 йылдың июненән 2017 йылдың майына тиклем 335 мең тапҡыр университет хаҡында мәғлүмәт эҙләгәндәр.

Эҙләү популярлығы рейтингына йәй башында «Интерфакс» баҫтырған исемлектән илдең 264 вузы, шул иҫәптән республиканың дүрт юғары уҡыу йорто ингән. Улар араһында беренсе урында — Башҡорт дәүләт университеты, икенселә — Өфө дәүләт нефть техник университеты (51-се урын һәм йылына 211 мең тапҡыр ҡаралған), артабан Өфө дәүләт авиация техник университеты килә (71-се урын һәм 172 мең ҡарау). Исемлектең аҙағында Башҡорт дәүләт аграр университеты (117-се урын һәм 108 мең ҡарау).

Башҡортостанда йәшәүселәрҙә башҡа ҡалаларҙағы университеттар араһында Ҡазан (Волга буйы) федераль университеты, Рәсәй Федерацияһы Хөкүмәте ҡарамағындағы Финанс университеты (Мәскәү), М.В. Ломоносов исемендәге Мәскәү дәүләт университеты, Ырымбур дәүләт университеты, «Юғары иҡтисад мәктәбе» милли тикшеренеү университеты (Мәскәү) популяр.

Рейтингтың беренсе баҫҡыстарында — Мәскәү һәм Санкт-Петербург вуздары: Мәскәү дәүләт университеты, Рәсәй Президенты ҡарамағындағы Халыҡ хужалығы һәм дәүләт хеҙмәте академияһы, Юғары иҡтисад мәктәбе, Санкт-Петербург дәүләт университеты.

Ҡағиҙә булараҡ, кешеләр юғары уҡыу йорттары хаҡында дөйөм мәғлүмәт эҙләй. Һорауҙарҙа «рәсми сайт», «расписание», «факультет», «кафедра», «исемлек» тигән һүҙҙәр йыш осрай.