Республика халыҡтың экологик әүҙемлеге буйынса «йәшел рейтинг»тың ун алдынғыһына ингән

ӨФӨ, 2017 йыл, 12 июль. /«Башинформ» мәғлүмәт агентлығы/. Башҡортостан халыҡтың экологик әүҙемлеге буйынса «йәшел рейтинг»тың ун алдынғыһына ингән. Рейтинг «Экойола» халыҡ-ара конкурсы сиктәрендә әҙерләнгән һәм заманса экологик йолалар булдырыуҙа һәм үҫтереүҙә халыҡтың әүҙемлек кимәлен күрһәтә. Ул «Яндекс»тың эҙләнеү статистика мәғлүмәттәренә нигеҙләнгән. Башҡортостан рейтингта 10 урынды биләй, ә исемлекте Төмән өлкәһе етәкләй.

«Экойола» конкурсы 2016 йылдың февралендә старт алды. «2015 йылда экологик йолалар темаһына ҡыҙыҡһыныу юҡ ине. Хәҙер бөтөнләй икенсе күренеш күҙәтелә, — тип иҫәпләй проект авторы Ольга Лавлинская. — Ағымдағы йылда конкурста Рәсәй, Ҡаҙағстан, Үзбәкстан һәм Белоруссия граждандары ҡатнашты. Абруйлы конкурста еңеүселәр иҫәбендә Башҡортостандан йәш Ульяна Симакова ла бар, ул икенсе урын алды».