Транспорт сараларын теркәүҙең яңы ҡағиҙәләре үҙ көсөнә инде

ӨФӨ, 2017 йыл, 10 июль. /«Башинформ» мәғлүмәт агентлығы, Ғәлиә Нәбиева/. ОСАГО полисы теркәү өсөн мотлаҡ документтар исемлегенән төшөрөлә. Был хаҡта мәғлүмәттәрҙе электрон төрҙә алыу ҡаралған, тип хәбәр итә ТАСС. Рәсәйҙең Эске эштәр министрлығы Дәүләт автоинспекцияһында транспорт сараларын теркәү ҡағиҙәләрен үҙгәртте, шулай уҡ ведомствоның административ регламентына төҙәтмәләр индерҙе. Үҙгәрештәр бөгөн, 10 июлдә үҙ көсөнә инә.

Документ иҫкереү, коррозия йәки идентификация номерҙары менән ремонтлау һөҙөмтәһендә үҙгәргән транспорт сараларын теркәү тәртибен аныҡлай. Ошондай транспорт сараларын идентификациялау мөмкин булғанда уларҙы теркәргә була.

Яңы ҡағиҙәләр транспортты тикшереү һәм документтар йыйыу процедураһын төшөрөп ҡалдырып, уның ҡарау урынына тапшырыу мөмкинлеген күҙ уңында тота. Был Берҙәм дәүләт хеҙмәттәре порталы аша ғариза биргән осраҡта ғына мөмкин. Өҫтәүенә транспорт сараһын теркәү өсөн мотлаҡ документтар исемлегенән ОСАГО полисы алынған. Ошо хаҡта мәғлүмәттәрҙе электрон төрҙә алыу ҡаралған.

Яңы ҡағиҙәләр мөмкинлектәре сикле кешеләр өсөн транспорт сараларын теркәүҙе ябайлаштыра.