Төбәктә йәшенле ҡойма ямғыр, боҙ яуыуы һәм елдең көсәйеүе көтөлә –Ғәҙәттән тыш хәлдәр министрлығы

ӨФӨ, 2017 йыл, 5 июль. /«Башинформ» мәғлүмәт агентлығы, Ксения Калинина/. Рәсәй Ғәҙәттән тыш хәлдәр министрлығының Башҡортостан буйынса баш идаралығы хәбәр итеүенсә, кесаҙна, 6 июлдә, республикала урыны менән ҡыҫҡа ваҡытлы ямғыр, айырым райондарҙа ҡойма йәшенле ямғыр, боҙ яуыуы көтөлә. Ел көньяҡ-көнбайыштан секундына 9-14 метр тиҙлектә иҫә. Ҡайһы бер райондарҙа — елдең 18-23 метрға тиклем көсәйеүе ихтимал. Был хаҡта республиканың гидрометеорология һәм тирә-яҡ мөхит мониторингы идаралығы хәбәр итә.

Көслө ел иҫкәндә Ғәҙәттән тыш хәлдәр министрлығы электр селтәрҙәре һәм ҡорамалдарының, йылытыу мейестәренең торошон тикшерергә кәңәш итә. Эске һәм тышҡы янғынға ҡаршы һыу тәьминәтенең, телефон бәйләнешенең төҙөклөгөн тәьмин итеү, янғынға ҡаршы инвентарҙы әҙерләргә кәрәк. Дауыл ваҡытында электр тапшырыу линиялары аҫтында тороу һәм өҙөлгән сымдарға яҡын килеү үлем менән янай.

Йортта балкондан һәм тәҙрә төбөнән әйберҙәрҙе алып ҡуйырға, ишек, тәҙрәләрҙе ныҡлап ябырға кәрәк. Тәҙрәгә яҡын килмәгеҙ. Фатирҙа көсөргәнеш артҡанда шунда уҡ бөтә электр көнкүреш приборҙарын һүндерегеҙ.

Урамда электр тапшырыу линиялары, ағастар, реклама таҡталары тирәһенән алыҫыраҡ йөрөү мөһим.

Юлдарҙа иғтибарлы һәм һаҡ булыу зарур. Водителдәргә тиҙлек режимын кәметергә кәңәш ителә.

Янғын хәүефенең юғары булыуы һәм көслө ел арҡаһында урмандарҙа усаҡ яғыу, ҡоро үләндәрҙе, ҡалдыҡтарҙы яндырыу, шулай уҡ тәмәке тартыу ҡәтғи тыйыла. Урман янғындарына юл ҡуймау өсөн тәбиғәткә сығыуҙан баш тартырға кәрәк.