Баш ҡалала снайпер Наталья Ковшованың граффити-портретын төшөрөү буйынса эш тамамланды

ӨФӨ, 2017 йыл, 30 июнь. /«Башинформ» мәғлүмәт агентлығы, Ольга Мортазина/. Өфөлә рәссам Артур Фазылов Сипайлово биҫтәһендә Наталья Ковшова урамында снайпер һәм Бөйөк Ватан һуғышы Геройының граффити-портретын төшөрөп бөттө. Эш ай ярым барҙы. Һүрәтте төшөрөү урыны итеп урындағы халыҡ 6-сы йорттоң диуарын һайланы. Күп ҡатлы бинаның тышҡы яғы граффити төшөрөр алдынан йылытылды, шулай уҡ ихата биләмәһе тәртипкә килтерелде, тип һөйләнеләр муниципалитетта.

Башҡортостандан 278 Бөйөк Ватан һуғышы Геройҙары исемлегендә ни бары ике ҡатын-ҡыҙ. Ул – Бәләбәйҙән летчик Мәғүбә Сыртланова һәм Өфөнән 22 йәше лә тулмай һәләк булған Наталья Ковшова. Уның хөрмәтенә Өфө урамына исем бирелгән, йыл һайын еңел атлетика марафоны уҙғарыла. Граффити-портреттың нисек төшөрөлөүе тураһында ҡыҫҡа видеола ҡарарға мөмкин.