Башҡортостанда республиканың иң көньяҡ нөктәһен билдәләнеләр

ӨФӨ, 2017 йыл, 27 июнь. /«Башинформ» мәғлүмәт агентлығы, Әлим Фәйезов/. Башҡортостанда республиканың иң көньяҡ нөктәһен билдәләнеләр. Ошо хаҡта мәғлүмәт Ейәнсура районының Ҡужанаҡ ауылында үткән «Һаумыһығыҙ, ауылдаштар» байрамында яңғыраны. Нәҡ Ҡужанаҡ Башҡортостандың иң көньяҡ нөктәһе булып тора, тип хәбәр итте байрамда ҡатнашыусы Ейәнсура районы хакимиәтенең эштәр менән идара итеүсеһе Басыр Хәбибуллин. «Башинформ» агентлығына Рус география йәмғиәтенең Башҡортостан төбәк бүләксәһендә был мәғлүмәтте раҫланылар яҡын арала ошоно белдереүсе махсус стела ҡуйыласағын билдәләп.

Байрам башланыр алдынан Ҡужанаҡ ауылы халҡы биләмә үҙәгендә Бөйөк Ватан һуғышы йылдарында яуҙа һәләк булған ауылдаштарына арналған обелиск янында йыйылды. Бында тантаналы шарттарҙа шул дәһшәтле һуғыштан Еңеү менән ҡайтҡан һәм емерелгән хужалыҡты тергеҙеүгә, тыуған ауылы үҫешенә баһалап бөткөһөҙ өлөш индергән бөтә ҡужанаҡтарҙың исеме соҡоп яҙылған иҫтәлекле гранит таҡтаташын асыу сараһы үтте. Ҡужанаҡтан 352 кеше фронтҡа китә, уларҙың 203-ө яу яланында ятып ҡала, 149 кеше генә кире әйләнеп ҡайта, тип билдәләне урындағы Ветерандар советы рәйесе Николай Гладышев тантанала сығыш яһап.

Артабан тағы ла ике тантана уҙҙы: мәсет һәм Александр Невский хөрмәтенә ғибәҙәтхана асыу. Ике изге йорт – мосолмандар өсөн мәсет һәм православныйҙар өсөн сиркәү ҙә – халыҡ, бағыусылар һәм шәфҡәт күрһәтеүселәрҙең аҡсаһына төҙөлдө. Был Ҡужанаҡ халҡының күптәнге хыялы ине, уларҙың яртыһын – башҡорттар, икенсе яртыһын урыҫтар тәшкил итә. Ниһәйәт, был хыял тормошҡа ашты.

Бынан һуң бөтә ауыл халҡы, шулай уҡ ошо көндө республиканың һәм илдең төрлө тарафтарынан ҡайтҡан яҡташтары Ҡороюл йылғаһы аша йәшел ҡояшлы аҡланда «Һаумыһығыҙ, ауылдаштар» байрамына йыйылды. Уҙғарылған «Иң яҡшы ихата», «Иң яҡшы баҡса», «Иң яҡшы сәскәлек», «Өлгөлө ғаилә», «Иң яҡшы йорт» конкурстары йомғаҡтары буйынса уларҙың еңеүселәренә һәм призерҙарына бүләктәр тапшырылды. Яңы ғибәҙәтхана – мәсет һәм сиркәү вәкилдәре лә район хакимиәтенән, бағыусыларҙан һәм шәфҡәт күрһәтеүселәрҙән бүләктәр алды. Сығышы менән Ҡужанаҡ ауылы вәкиле, «Мой Кужанак» китабы авторы, «Башинформ» мәғлүмәт агентлығының баш мөхәррир урынбаҫары Алик Шакиров шәхси китапханаһынан йөҙҙән ашыу китапты ауыл китапханаһына бүләк итеп тапшырҙы. 60 йыллыҡ туйҙарын билдәләүсе ғаиләләр республика башлығынан һәм район башлығынан бүләктәр, ҡотлау сәләмдәрен алды.

Ҡояш байығанға тиклем аҡланда һәүәҫкәр, район Мәҙәниәт йорто артистары, шул иҫәптән республиканың атҡаҙанған мәҙәниәт хеҙмәткәре, район Советы депутаты, сығышы менән Ҡужанаҡ ауылы вәкиле Вафа Мәүлетов башҡарыуында йыр-бейеүҙәр тынманы. Төрлө уйындар, спорт бәйгеләре, көрәш ойошторолдо. Ысынында иһә, был ҡояшлы эҫе һауа торошо менән биҙәлгән ысын һабантуй булды.