Республикала йәшәүселәрҙең ялдың ниндәй төрөнә өҫтөнлөк биреүе билдәле булды

ӨФӨ, 2017 йыл, 22 июнь. /«Башинформ» мәғлүмәт агентлығы, Ксения Калинина/. Башҡортостандың Ғәҙәттән тыш хәлдәр буйынса дәүләт комитеты республика халҡы араһында йәйгеһен ялдың ниндәй төрөнә өҫтөнлөк бирәһегеҙ тигән социаль һорау алыу үткәрҙе. Тикшеренеүҙә йөҙҙән ашыу кеше ҡатнашты. Респонденттарҙың яртыһынан ашыуы Башҡортостандағы ялды хуп күрә.

28,6% буш ваҡытын төбәктең һыу ятҡылыҡтарында ял итергә ярата. Ведомство мәғлүмәте буйынса, республика биләмәһендә меңгә яҡын йылға аға, өс мең самаһы күл бар. 21,4% экстремаль ял өсөн тауыш биргән. Туризмға өҫтөнлөк биргән кешеләр һанының йылдан-йыл артыуы билдәләнә. 2016 йылда ғына Башҡортостан Ғәҙәттән тыш хәлдәр буйынса дәүләт комитетының авария-ҡотҡарыу хеҙмәтендә 320-нән ашыу төркөм теркәлгән, улар араһында 2,5 меңе — балалар.

Сит илдәге ял да шунса процент йыйған.

«Барырға йыйынған дәүләткә хас үҙенсәлектәр менән алдан танышыу мөһим. Был һеҙгә сәфәргә дөрөҫ әҙерләнергә һәм кәрәкле әйберҙәр алырға ярҙам итәсәк. Башҡа кешеләрҙең ошо дәүләт, ҡала йәки ҡунаҡхана хаҡында фекерҙәрен уҡыу артыҡ булмаҫ», — тип асыҡлыҡ индерҙеләр Дәүләт комитетының матбуғат хеҙмәтендә.

14,3% баҡсала, ҡала шау-шыуынан алыҫта ял итеүҙе һайлай. 4,8% диванда телевизор алдында ял итеүҙе хуп күрә. Мәҙәни ялға — музейҙарға, күргәҙмәләргә, иҫтәлекле урындарға килгәндә, уға ихтыяж аҙ — 2,4%.

«Ҡыш көнө статистика икенсе һандарҙы күрһәтер ине, моғайын. Йәй — ул сәйәхәттәр, саф һауа һәм йылы һыу ятҡылыҡтары, — тип йомғаҡ яһанылар ведомствола. — Ниндәй ялды һайлаһағыҙ ҙа, иң мөһиме, ул хәүефһеҙ булһын».