25 июндә Башҡортостан мосолмандары Ураҙа байрамын билдәләй

ӨФӨ, 2017 йыл, 20 июнь. /«Башинформ» мәғлүмәт агентлығы, Гөлфиә Акулова/. 25 июндә бөтә республикала Рамаҙан айының тамамланыуына – барлыҡ мосолмандар өсөн изге Ураҙа байрамына (Ид әл-Фытыр) арналған саралар уҙа.

Был көндө республиканың бөтә мәсеттәрендә байрам хөрмәтенә диндарҙар ғибәҙәт ҡыла, иртән байрам намаҙына баҫа. Шулай уҡ был көндө туғандар менән осрашалар, бүләктәр бирәләр һәм изге теләктәр әйтәләр, ҡунаҡҡа саҡыралар.

Рәсәй мосолмандары үҙәк диниә назараты һәм Өфө хакимиәте булышлығында «Ферзь эшлекле клуб» социаль әһәмиәтле проекттарға төбәк йәмәғәт ярҙам итеү һәм үҫтереү ойошмаһы 25 июндә «Ватан» этнопаркына байрам мәжлесенә саҡыра. Ҙур байрам программаһы әҙерләнгән: башҡорт һәм татар эстрадаһы йондоҙҙары ҡатнашлығындағы концерт, көнсығыш йәрминкәһе, балалар өсөн уйындар, бүләктәр уйнатыу һәм былау менән һыйлау. Сара иртәнге сәғәт 12-лә башлана.