20 июндән бөтә фәндәр буйынса Берҙәм дәүләт имтиханын ҡабаттан тапшырыу көндәре башлана

ӨФӨ, 2017 йыл, 20 июнь. /«Башинформ» мәғлүмәт агентлығы, Эльмира Сабирова/. 20 июндән 1 июлгә ҡәҙәр бөтә фәндәр буйынса Берҙәм дәүләт имтиханын ҡабаттан тапшырыу көндәре ҡаралған. Башҡортостандың Мәғариф министрлығында аңлатыуҙарынса, резерв көндәрҙә имтихандарҙы алдағы йылғы сығарылыш уҡыусылары, шулай уҡ мотлаҡ фәндәрҙең береһе – рус теле йәки математика буйынса насар өлгө алған йәки кисерерлек сәбәп буйынса имтиханға килмәгән быйылғы сығарылыш уҡыусылары тапшыра ала.

20 июнь – география, информатика һәм ИКТ фәндәрен тапшырырға теләүселәр өсөн резерв көн. 21 июнь – әҙәбиәт, химия, физика, йәмғиәтте өйрәнеү; 22 июнь – биология, тарих, сит телдәр; 23 июнь – сит телдәр (телдән); 28 июнь – математика; 29 июнь – рус теле; 1 июль – бөтә фәндәр буйынса БДИ.