Республикала Совет һалдатына һәйкәл асылды

ӨФӨ, 2017 йыл, 13 июнь. /«Башинформ» мәғлүмәт агентлығы, Ғәлиә Нәбиева/. Рәсәй көнөн байрам итеү сиктәрендә Ҡырмыҫҡалы ауылында Совет һалдатына һәйкәл асылды. Тантаналы сара еңеү паркы биләмәһендә үтте. Унда Башҡортостан Дәүләт Йыйылышы спикеры Константин Толкачев, Дәүләт Думаһы, Дәүләт Йыйылышы депутаттары, республиканың Мәҙәниәт министрлығы, урындағы үҙидара органдары вәкилдәре, ветерандар, эҙәрмәндәр, район халҡы һәм уның ҡунаҡтары ҡатнашты.

Рәсәй хәрби-тарихи йәмғиәттең төбәк бүлексәһе (уның рәйесе Константин Толкачев) һәм муниципалитет хакимиәте тырышлығы менән һәйкәл яңыртылды. Йәмғиәт бүлексәһе районға Совет һалдатының скульптураһын һәм иҫтәлек яҙыуҙары менән пилондарҙы тапшырҙы, тип аңлаттылар төбәк парламентының матбуғат хеҙмәтендә.

Константин Толкачев байрамда ҡатнашыусы ветерандарға рәхмәт әйтте һәм сараға йыйылғандарҙың иғтибарын ошондай сараларҙың тарихи дөрөҫлөктө һаҡлап ҡалыуға тәьҫир иткәненә, үҙ иленең мөһим тарихи биттәре хаҡында хәтерләргә тейеш йәш быуынға көслө тәрбиәүи йоғонто яһауына йүнәлтте.

Һәйкәлде асыу тантанаһы сиктәрендә эҙәрмәндәр отрядының күргәҙмәһе ойошторолдо, барлыҡ теләүселәр өсөн ялан кухняһы һәм район хәрби комиссариаты бинаһында Хәрби Дан күргәҙмә залы эшләне.