Башҡортостанда «Бурыслы» операцияһы иғлан ителде

ӨФӨ, 2017 йыл, 13 июнь. /«Башинформ» мәғлүмәт агентлығы, Ксения Калинина/. 13-21 июндә Башҡортостанда «Бурыслы» операцияһы үткәрелә. Ул хоҡуҡ боҙоусыларға ҡылған эштәре өсөн язаның ҡотолғоһоҙ икәнлеген иҫкә төшөрөүгә йүнәлтелгән. ЮХХДИ хеҙмәткәрҙәре юл хәрәкәте ҡағиҙәләрен боҙған өсөн штрафтарын түләмәгән водителдәрҙе һәм йәйәүлеләрҙе асыҡлай. Был эш даими алып барыла, ләкин күрһәтелгән осорҙа өҫтәмә рәүештә суд приставтары хеҙмәте хеҙмәткәрҙәре йәлеп ителә, тип хәбәр иттеләр ведомствола.

Штрафтар буйынса бурыстары булған водителдәр асыҡланған осраҡта, закон буйынса уларҙы административ яуаплылыҡҡа йәлеп итеү тураһында ҡарар ҡабул ителә. Уларҙың 15 тәүлеккә тиклем административ аресҡа тарттырылыуы ихтимал. Йә иһә штраф ике тапҡырға арта.

Дәүләт автоинспекцияһында хәбәр итеүҙәренсә, штраф ҡарар законлы көсөнә ингәндән алып 60 көн эсендә түләнергә тейеш.