Рәсәй туристары пляж булған урындарҙа ял итеүҙе хуп күрә

ӨФӨ, 2017 йыл, 9 июнь. /«Башинформ» мәғлүмәт агентлығы, Ксения Калинина/. Рәсәй туристары сит илдәргә йышыраҡ оса башланы. Популяр йүнәлештәргә ихтыяж былтырғы йыл менән сағыштырғанда яҡынса 30 процентҡа артҡан, тип яҙа «Известия» гәзите Рәсәй туроператорҙары ассоциацияһының мәғлүмәттәренә һылтанып. Ҡышҡы осорҙа рәсәйҙәр Гоа, Таиланд, Һиндостан, Вьетнам, Доминикана тарафтарына йышыраҡ юл тотһа, йәйгеһен ғәҙәттәгесә Кипр, Греция, Болгария, Тунис, Испания һәм Төркиә популяр.

Рәсәй туроператорҙары ассоциацияһы президенты Дмитрий Гориндың фекеренсә, Рәсәйҙә туристик бизнес күтәрелә, ул тәү сиратта валюталарҙың курсы тотороҡланыу һәм ҡайһы бер илдәр менән виза режимын ябайлаштырыу менән бәйле. Аномаль һыуыҡ яҙ ҙа быға тәьҫир итте.

«Беҙҙең ябай булмаған климат шарттарын һәм йылда яҡты көндәрҙең һанын иҫәпкә алғанда, һауа торошо туризмға, әлбиттә, йоғонто яһай. Кешеләргә йылы, ҡояш һәм диңгеҙ кәрәк. Шуға ла пляж туризмы өҫтөнлөккә эйә. Оҙаҡламай йәйҙең уртаһы етә, ә ул әле һаман юҡ», — тип билдәләне Дмитрий Горин.