Ҡырым Башҡортостанға Евпаториялағы балалар шифаханаһын тапшырасаҡ

ӨФӨ, 2017 йыл, 7 июнь. /«Башинформ» мәғлүмәт агентлығы/. Ҡырым Башҡортостанға Евпаториялағы балалар шифаханаларының береһен тапшырасаҡ, тип хәбәр итте республика Башлығы Рөстәм Хәмитов Социаль хеҙмәткәр көнөнә арналған тантаналы йыйылышта сығыш яһап.

- Май айында Ҡырым Республикаһы менән сауҙа-иҡтисади һәм социаль-мәҙәни өлкәләрҙә хеҙмәттәшлек тураһындағы килешеүгә ҡул ҡуйҙыҡ. Яңыраҡ ҡына Ҡырым Республикаһы етәкселеге менән Башҡортостанға Евпаториялағы балаларҙы һауыҡтырыу шифаханаларының береһен тапшырыу хаҡында килештек, – тине Рөстәм Хәмитов. – Уны йүнәтеп, яңыртып,тәртипкә килтерәсәкбеҙ һәм ошо шифаханала йыл һайын 5 мең самаһы бала һаулығын нығыта аласаҡ. Был бик яҡшы проект тип уйлайым. Һис шикһеҙ, беҙ быға аҡсаны йәлләмәйәсәкбеҙ, сөнки ул бик мөһим эш. Диңгеҙ буйына һыу инеү һәм емеш-еләк ашау өсөн генә барыу түгел, ә тейешле дауаланыу өсөн дә. Бынан тыш, шифахана йыл әйләнәһенә эшләйәсәк.

Балаларҙың сифатлы һәм хәүефһеҙ йәйге ялын ойоштороу көнүҙәк темаларҙың береһе булып тора, тип билдәләне төбәк Башлығы. Быйыл Башҡортостанда 400 мең самаһы баланың һауыҡтырыу лагерҙарында һәм шифаханаларҙа ял итеүе һәм һаулығын нығытыуы күҙаллана. Был маҡсатҡа 1,6 миллиард һум самаһы бүленгән.