Өфөлә үҫмерҙәр вандализмына ҡаршы флешмоб ойошторола

ӨФӨ, 2017 йыл, 6 июнь. /«Башинформ» мәғлүмәт агентлығы, Гөлфиә Акулова/. 14 июндә Өфөләге Иван Яҡутов исемендәге мәҙәниәт һәм ял паркында баш ҡала хакимиәтенең йәштәр эштәре буйынса комитеты, ҡаланың «ИНДИГО» үҙәге һәм Рәсәй студенттар отрядының төбәк ойошмаһы «М көнө» флешмобын уҙғара. Сара балалар һәм үҫмерҙәр вандализмы күренештәрен иҫкәртеү, үҫмерҙәрҙең милли һәм мәҙәни мираҫҡа, тарихи ҡиммәттәргә ҡарата вәхшиҙәрсә мөнәсәбәтенә кире ҡараш формалаштырыу маҡсатында ойошторола, тип хәбәр итә мэрияның матбуғат хеҙмәте.

Сара барышында «Йәштәр вандализмға ҡаршы!» асфальтта рәсем яһау конкурсы, М. Аҡмулла исемендәге Башҡорт дәүләт педагогия университетының художество-графика факультеты студенттары ҡатнашлығында граффити буйынса оҫталыҡ дәресе, флешмоб-пленэр, балалар өсөн аквагрим менән зона ойоштороу ҡаралған. Байрам «Мин үҙ ҡаламды яратам!» тигән концерт менән тамамлана.

Киске сәғәт 5-тә башлана.