Башҡортостанда 15 етем бала фатир асҡыстары алды

ӨФӨ, 2017 йыл, 2 июнь. /«Башинформ» мәғлүмәт агентлығы, Дарья Петрова/. 1 июндә, Халыҡ-ара балаларҙы яҡлау көнөндә Белоретта етем һәм ата-әсә ҡарауынан мәхрүм ҡалған балалар фатир асҡыстары алды. Йорт туйлаусылар Выселки-2 биҫтәһендәге Шайморатов урамында урынлашҡан өс ҡатлы төҙөкләндерелгән яңы йортта йәшәйәсәк.

«Һәр кеше торлаҡлы булыуға хоҡуҡлы һәм етем, ата-әсә ҡарауынан мәхрүм ҡалған балаларҙың торлаҡ хоҡуғы проблемалары элеккесә иң мөһим булып ҡала һәм уға ҙур иғтибар бүленә, — тине йәштәрҙе ҡотларға килгән Белорет районы хакимиәте башлығы Владислав Миронов. — Халыҡ-ара балаларҙы яҡлау көнөндә һеҙгә көтөп алған асҡыстарҙы тапшырыу миңә икеләтә ҡыуаныслы. Уларҙа йәшәү өсөн бөтә шарттар ҙа булдырылған: эсе эшләнгән, сантехника ҡуйылған һәм бөтә кәрәкле коммуникациялар үткәрелгән».

15 йорт туйлаусының һәр ҡайһыһы 30 квадрат метрҙан ашыу майҙандағы үҙенең бер бүлмәле фатирында йәшәйәсәк.

Белорет районы хакимиәтенең мәғлүмәт-аналитика бүлеге мәғлүмәттәре буйынса, 2012-2016 йылдарҙа етем һәм ата-әсә ҡарауынан мәхрүм ҡалған балаларға бөтәһе 108 торлаҡ бирелгән.