Республикала Ғабдулла Туҡайҙың Өфөгә килеүенең 105 йыллығына арналған конференция үтте

ӨФӨ, 2017 йыл, 31 май. /«Башинформ» мәғлүмәт агентлығы, Ғәлиә Нәбиева/. Өфөнөң ижади йәмәғәтселеге бөйөк татар шағиры Ғабдулла Туҡайҙың Өфөгә килеүенең 105 йыллығын билдәләне. Республика Башлығы хакимиәте, Халыҡтар дуҫлығы йорто булышлығында «Башҡортостан Республикаһы татарҙары милли-мәҙәни автономияһы» төбәк йәмәғәт ойошмаһы «Туғандаш халыҡтарҙың әҙәбиәтендә быуындарҙың күсәгилешлелеге» икенсе бөтә Рәсәй конференцияһын уҙғарҙы. Әҙәби симпозиум Мифтахетдин Аҡмулла исемендәге Башҡорт дәүләт педагогия университетында үтте.

«Туҡайҙың эҙҙәре күптән юғалған, әммә ул күңелдәребеҙҙә хәтерҙән сыҡмаҫлыҡ тәрән эҙ ҡалдырҙы. Ҡазан, Ырымбур, Силәбе ғалимдары бөгөн ошо бөйөк шағирҙың халыҡтарыбыҙ әҙәбиәтендәге ролен иҫкә алды, «Туҡай әҙәбиәттә» энциклопедияһының исем туйын уҙғарҙы. Башҡорт дәүләт педагогия университеты доценты Альбина Хәйруллинаның китабы ҙур ҡыҙыҡһыныу уятты. Ул Туҡай тураһында башҡорт һәм татар шағирҙарының шиғырҙар йыйынтығын туплаған», — тип һөйләне Татарҙар милли-мәҙәни автономияһы рәйесе Римма Үтәшева.

Бөйөк шағирҙың ижадынан ләззәт алырға Башҡортостан халыҡтары ассамблеяһы, Рустар соборы, Башҡорт ҡоролтайының Башҡарма комитеты вәкилдәре килде.

«Бөгөн шағир хаҡында хәтер милләтебеҙҙе берләштерә, ул дәреслектәрҙә лә, күп кенә ҡалаларҙың урам атамаларында ла һаҡланып ҡалған. Өфөлә Ғабдулла Туҡайға һәйкәл ҡуйыласағына ышанабыҙ», — тип өмөтөн белдерҙе Римма Үтәшева.

Конференция башҡорт һәм татар башҡарыусыларының концерты менән дауам итте.