Рөстәм Хәмитов «Шифахана-2017» форумында ҡатнашыусылар менән шифахана-курорт тармағын яңыртыу мәсьәләләрен тикшерҙе

ӨФӨ, 2017 йыл, 31 май. /«Башинформ» мәғлүмәт агентлығы/. Башҡортостан Башлығы Рөстәм Хәмитов Милли курорт ассоциацияһы президенты Александр Разумов һәм Бөтә донъя һыу һәм климат менән дауалау федерацияһы (FEMTEC) президенты Умберто Солимене менән осрашты. Улар Өфөлә үткән «Шифахана-2017» Бөтә Рәсәй форумында ҡатнашты. Осрашыуҙа шифахана-курорт тармағын яңыртыу, республика шифаханаларының эш һөҙөмтәлелеген күтәреү мәсьәләләре тикшерелде.

– Бер яҡтан, беҙ ысынлап та ошо йәһәттән үҫешкән биләмә. Беҙҙә бер нисә бик шәп шифахана-курорт учреждениеһы: өлкәндәр өсөн туғыҙ, бер балалар шифаханаһы, профилакторийҙар бар. Күрһәткестәребеҙ һәйбәт. Шифахана-курорт комплексының әйләнеше яҡынса 4 миллиард һум тәшкил итте. Ял итеүселәрҙең һаны юғары, ҡайһы бер осорҙа ул 105-110 процентҡа етә, – тине Рөстәм Хәмитов. – Ләкин, икенсе яҡтан, хәл ителмәгән мәсьәләләр ҙә байтаҡ. Был тәү сиратта шифаханалар эшенә инвестицияларҙың етерлек булмауына, шулай уҡ республикабыҙҙа йәшәүселәр өсөн хаҡтың үтә юғарылығына бәйле. Әлеге көндә кадрҙар ҡеүәте лә баһалау талап итеүен аңлайбыҙ.

Республика Башлығы әйткән мәсьәләләр хаҡында һөйләгәндә, Александр Разумов, шифахана-курорт комплексы менән идара итеүҙең берҙәм төбәк системаһын булдырыу уларҙы хәл итеүгә булышлыҡ итә алыр ине, тип билдәләне. Ул Алтай крайының «Курорт Белокуриха» шифаханалар селтәрен уңышлы миҫал итеп килтерҙе.

Белгес фекеренсә, шифаханаларҙа тейешле медицина документтарын тултырмайынса сәләмәт клиенттар йәки ғаилә ялы өсөн урындарҙы ла ҡарарға кәрәк. Russia.Travel милли туристик порталы һәм уның нигеҙендә булдырылған мобиль ҡушымта ошо йүнәлеште үҫтереүгә булышлыҡ итеүгә йүнәлтелгән.

Шул уҡ ваҡытта республика шифаханаларын аныҡ йүнәлештәргә бүлергә кәрәк. Был уларҙың эшләгән аҡсаһының күләмен һаҡларға мөмкинлек бирәсәк.

Башҡортостан шифаханаларының һөҙөмтәлелеген күтәреүҙең башҡа саралары иҫәбендә Милли курорт ассоциацияһы президенты ер һәм мөлкәт йәһәтенән һалым йөкләмәһен кәметеүҙе, шулай уҡ медицина учреждениеһының килемдәрен һәм сығымдарын аныҡ контролдә тотоуҙы атаны.

Умберто Солимене республика алдында килеп тыуған мәсьәләләрҙе хәл итеүҙең халыҡ-ара тәжрибәһе менән уртаҡлашты. Атап әйткәндә, ул медицина страховкалауы системаһын үҫтереүгә иғтибар бүлергә, шулай уҡ курортология өлкәһендә белгестәр әҙерләү менән шөғөлләнергә тәҡдим итте.