Төбәктә тәүге һабантуй Күгәрсен районында үтте

ӨФӨ, 2017 йыл, 29 май. /«Башинформ» мәғлүмәт агентлығы/. Башҡортостанда яҙғы баҫыу эштәренең тамамланыуын белдергән һабантуйҙар мәле башланды. Беренсе һабан байрамы Күгәрсен районында уҙҙы, унда аграрийҙар һоло, бойҙай, шәкәр сөгөлдөрө, көнбағыш, борсаҡ сәсеүҙе тулыһынса тамамлаған. Быйыл күгәрсендәр яҙғы культураларға — 50,1 мең, шул иҫәптән бөртөклөләр һәм ҡуҙаҡлылар өсөн 26,9 мең гектар майҙан бүлгән. Һабантуйҙа ауыл эшсәндәре, етештереү алдынғылары, иң яҡшы ауыл хужалығы предприятиелары бүләкләнде.

Башҡортостанда һабантуйҙар үткәреү графигы республика башлығы указы менән раҫланған. Күпселек байрамдар 3 һәм 10 июнгә билдәләнгән, тип хәбәр иттеләр Башҡортостан Хөкүмәтенең матбуғат хеҙмәтендә.