Таможня хеҙмәткәрҙәре республика мосолмандары өсөн хаж ойоштороусыларға консультациялар бирҙе

ӨФӨ, 2017 йыл, 26 май. /«Башинформ» мәғлүмәт агентлығы, Әлфиә Әғлиуллина/. Башҡортостан мосолмандары өсөн хаж ойоштороуҙа ярҙам күрһәтеү буйынса эш осрашыуы булды. Уны Башҡортостан таможняһы етәксеһенең беренсе урынбаҫары Юрий Соколов һәм «Өфө» аэропортының таможня посы начальнигы Сергей Мельников үткәрҙе. Сарала Башҡортостанда хаж ойоштороусылар — «Урал-Сервис» компанияһы һәм «Хаж Фонды» хаж ҡылыуҙы үҫтереүгә булышлыҡ итеү хәйриә фонды вәкилдәре ҡатнашты.

Таможня хеҙмәткәрҙәре уларға диндарҙар тарафынан шәхси ҡулланылыштағы әйберҙәрҙе сик аша сығарыу, таможня органдарының һәм вазифалы кешеләрҙең ҡарарҙарына ялыу биреү тәртибе, таможня ҡағиҙәләрен боҙған өсөн яуаплылыҡ хаҡында һөйләне.

Икенсе илдең таможня биләмәһенә ҡулаҡса, көслө тәьҫир итеүсән дарыуҙар, дини культ предметтары ихтималлығы булған дини әҙәбиәт, мәҙәни ҡиммәттәр индереү мәсьәләләренә айырыуса ҙур иғтибар бүленде.

Осрашыуҙа ҡатнашыусылар мәғлүмәти хәтер дәфтәрҙәрен, пассажирҙар өсөн таможня декларациялары бланктарын һәм уларҙы тултырыу өлгөләрен алды. Артабан уларҙы ғибәҙәт ҡылыусыларға таратыу күҙаллана.

Ғибәҙәт ҡылыусыларҙың тәүге төркөмө Сәғүд Ғәрәбстаны Короллегенә 14 августа юллана, тип хәбәр иттеләр Башҡортостан таможняһында. Диндарҙар Өфө — Истанбул — Джидда, Өфө — Дубай — Мәҙинә, Өфө — Мәскәү — Дубай — Мәҙинә рейстары менән оса.

Быйыл Башҡортостанда 600-гә яҡын мосолман хажға барырға йыйына.