Өфөнөң Дим биҫтәһендә 280 себер эрбете ултыртылды

ӨФӨ, 2017 йыл, 25 май. /«Башинформ» мәғлүмәт агентлығы, Ольга Мортазина/. Өфөнөң Дим биҫтәһендә 280 себер эрбете үҫентеһе ултыртылды. Ҡала районы хакимиәтендә хәбәр итеүҙәренсә, ағастар «Баланов» урман паркы биләмәһендә ултыртылған, унда Рус география йәмғиәтенең төбәк бүлексәһе һәм «Росток» балалар экология-биология үҙәге көсө менән фәнни маҡсатта төрлө үҫемлектәр үҫтерелгән дендрарий — ботаник баҡса булдырыла. Биш йыллыҡ кедр үҫентеләре Ханты-Манси автономиялы округынан килтерелгән, уларҙы сығышы менән Башҡортостандан булған, әммә Ханты-Мансийск ҡалаһында йәшәгән эколог-йәмәғәтсе Миҙхәт Хәсәнов тапшырған.

Себер эрбеттәре һауаны таҙартып ҡына ҡалмаясаҡ, ҡоштарға ла аҙыҡ буласаҡ. Ләкин тубырсыҡтар өлгөрһөн өсөн ағастар 25 йәшкә етергә тейеш, шуға күрә уларҙы тәрбиәләп торорға кәрәк. Ағас ултыртыуҙа урындағы халыҡ, уҡыусылар, йәмәғәтселәр, чиновниктар ҡатнашты.