25 майҙа республикала Өршәк йылғаһы аша күпер ябыла, урау юл схемаһы билдәләнгән

ӨФӨ, 2017 йыл, 23 май. /«Башинформ» мәғлүмәт агентлығы, Ғәлиә Нәбиева/. 25 майҙан Өфө районында Фомичев-Булгаков-Федоровка автомобиль юлында Өршәк йылғаһы аша күпер ремонтҡа ябыла. Ремонт эштәре 2017 йылдың 25 октябренә тиклем дауам итә, тип хәбәр иттеләр муниципалитетта. Транзит транспорты хәрәкәтен ойоштороу схемаһы раҫланған. Күперҙе төҙөкләндергән ваҡытта Фомичев-Енғалыш-Осоргин-Зубов автомобиль юлы аша йөрөргә тура киләсәк.

«Дормост» яуаплылығы сикләнгән йәмғиәте подрядсы ойошмаһы төҙөлөш техникаһы һәм Өршәк йылғаһы аша күперҙе йүнәтеү өсөн майҙансыҡ әҙерләй. Белгестәр йылға үҙәнен ағастарҙан таҙарта һәм майҙансыҡты тигеҙләй. Подрядсылар Шишмә районының Енғалыш ауылы аша урау юл һала, ваҡытлыса юл билдәләре һәм юл хәрәкәтен ойоштороу схемаһының үҙгәреше күрһәтелгән мәғлүмәт таҡталары ҡуя.

Өршәк йылғаһы аша күперҙә ремонт эштәре Рәсәй Транспорт министрлығының «Хәүефһеҙ һәм сифатлы юлдар» өҫтөнлөклө проектын ғәмәлгә ашырыу барышында башҡарыла.