Республикала «Мәрхәмәт» фонды ҡот осҡос аварияла ата-әсәһен юғалтҡан ҡыҙҙы дауалау өсөн аҡса йыя

ӨФӨ, 2017 йыл, 10 май. /«Башинформ» мәғлүмәт агентлығы, Гөлфиә Акулова/. Башҡортостанда «Мәрхәмәт» хәйриә фонды Бөрө ҡалаһынан ете йәшлек Әминәне дауалау һәм реабилитациялау өсөн аҡса йыя. Быйыл ғинуар айында ҡыҙыҡай биш йәшлек һеңлеһе Дәминә һәм ата-әсәһе менән бергә ҡот осҡос аварияға эләгә. Ата-әсәһе һәләк була, балалар төрлө йәрәхәттәр ала. Әминәнең умыртҡа һөйәге ныҡ имгәнгән, ҡыҙыҡай атлай алмай.

Әлеге көндә ул «Мәрхәмәт» фонды һәм партнерҙар ярҙамы менән Өфөләге «Яратҡан сабый» реабилитация үҙәгендә дауалана. Фондтың директоры Айгөл Гәрәева хәбәр итеүенсә, реабилитациялауҙың тәүге һөҙөмтәләре күренә. Бер ай дауаланыу өсөн түләнгән, табиптар дауалауҙы тағы ла бер айға оҙайтырға булған. Тейешле сумманы индерергә әҙер партнерҙар бар, ләкин фатирҙы ҡуртымға алыу һәм патронат шәфҡәт туташы өсөн аҡса кәрәк. Бының өсөн 3141 номерына «ДЕТИ 100» һүҙе яҙылған SMS ебәрергә, 100 урынына теләһә ниндәй сумманы күрһәтергә мөмкин.