Республикала ҡала яны поездарында Георгий таҫмалары таратыла

ӨФӨ, 2017 йыл, 5 май. /«Башинформ» мәғлүмәт агентлығы, Әлим Фәйезов/. Башҡортостан биләмәһендә йөрөгән ҡала яны поездарында Бөйөк Ватан һуғышында Еңеү көнөнә арналған акция уҙа, уның барышында Георгий таҫмалары таратыла.

«Акция транспорт ойошмаһы тарафынан хеҙмәтләндерелгән барлыҡ ҙур ҡалаларҙа уҙғарыла. Георгий таҫмаларын тәүгеләрҙән булып «Толпар» транспорт проектының Өфө ҡала электричкаһы пассажирҙары алды, — тип һөйләнеләр Башҡортостандың ҡала яны пассажирҙар компанияһында. — Байрам, хәрби батырлыҡ һәм ҡаһарманлыҡ символы — Георгией таҫмалары — байрам көндәрендә тимер юл платформаларында һәм вокзалдарҙа ла таратыласаҡ». Йола буйынса, ошо көндәрҙә Башҡортостандың ҡала яны пассажирҙар компанияһы хеҙмәткәрҙәре Өфөләге Көньяҡ зыяраттың «Дан аллеяһы» мемориалында республикала ҡала яны пассажирҙар хәрәкәтен ойоштороусыларҙың, яугир-фронтовиктар Ф.С. Кульневич, С.Д. Фурманов һәм А.С. Сабчуктың ҡәберҙәренә сәскә һаласаҡ. Шулай уҡ компанияның йәш хеҙмәткәрҙәре һәм баш ҡала мәктәптәренең өлкән класс уҡыусылары өсөн Куйбышев тимер юлының Башҡортостандағы Хәрби һәм Хеҙмәт даны музейына экскурсия ойоштороласаҡ. Унда йәштәр «Еңеүҙең ҡорос юлдары» экспозицияһында республика тимер юлсыларының Бөйөк Ватан һуғышы йылдарындағы ҡаһарманлығы хаҡында беләсәк. Ҡала яны поездарында поезд телевидениеһы аша һуғыш геройҙарына бағышланған тапшырыуҙар күрһәтеү ҡаралған, тип хәбәр итте Башҡортостан ҡала яны пассажирҙар компанияһының матбуғат секретары Сергей Спатар.