Өфөлә республиканың һаулыҡ һаҡлау министры менән осрашыу үтәсәк

ӨФӨ, 2017 йыл, 2 май. /«Башинформ» мәғлүмәт агентлығы, Гөлфиә Акулова/. 5 майҙа Башҡортостандың Йәмәғәт палатаһы «Министр менән бер сәғәт» проекты сиктәрендә республиканың һаулыҡ һаҡлау министры Әнүәр Бакиров менән осрашыу уҙғара.

Осрашыуҙа төбәктә һаулыҡ һаҡлауҙың хәле, медицина кадрҙарын һәм алдынғы медицина йүнәлештәрен әҙерләү тураһында мәсьәләләр ҡараласаҡ. Йәмәғәт палатаһы ағзалары һәм осрашыуға саҡырылғандар һаулыҡ һаҡлау министры менән республикалағы демографик хәлде, медицина ярҙамының асыҡлығын, юғары технологик медицина ярҙамын, телемедицинаны индереүҙе, ауылда һаулыҡ һаҡлауҙы үҫтереү перспективаларын, дауалау учреждениеларын төҙөү һәм яңыртыу пландарын, медицина ярҙамын күрһәтеүгә халыҡ ялыуҙарының тәүшарттарын һәм сәбәптәрен тикшерәсәк.