Төбәктә талпан ҡаҙалыуҙың тәүге осраҡтары теркәлде

ӨФӨ, 2017 йыл, 28 апрель. /«Башинформ» мәғлүмәт агентлығы, Эльмира Сабирова/. Быйыл Башҡортостанда талпандар ғәҙәттәгенән һуңыраҡ «уянды». Ләкин улар әүҙемлеген юғалтмаған. Республика буйынса Роспотребнадзор идаралығы мәғлүмәтттәренә ярашлы, әлеге көндә 30-ҙан ашыу кеше талпандан зыян күргән. Ведомствола уларҙың күпмеһе бала икәнлеге хаҡында мәғлүмәт бирелмәй. Бөжәктәрҙең талпан энцефалиты вирусы менән зарарланыу кимәле 4,3 процент тәшкил итә. Был күрһәткес 2016 йылдың ошо уҡ осоро менән сағыштырғанда түбәнерәк — 6,7 процент.

Талпан энцефалитына ҡаршы вакцина эшләү — хәүефле сирҙәрҙән иң ышаныслы һаҡланыу сараһы, тип билдәләй белгестәр. Май байрамдары алдынан эпидемиологтар йәнә һаҡланыу саралары хаҡында иҫкәртә. Тәбиғәт ҡосағына сыҡҡанда бөтә тәнде ҡаплаған кейем кейергә, махсус спрейҙар ҡулланырға, үҙеңде һәм яҡындарыңды иғтибарлап ҡарарға кәрәк.

Әле республикала парктар, скверҙар һәм урмандар акарицид ярҙамында эшкәртелмәгән. Төбәктә уңайлы һауа шарттары булыу менән был эш башланасаҡ. 2017 йылда 3,7 мең гектарҙан ашыу биләмәлә ошондай эштәр күҙаллана.

Бөжәктәрҙең энцефалит һәм боррелиоз вирустары менән зарарланыу кимәлен Гигиена һәм эпидемиология үҙәгендә, уның филиалдарында тикшертергә мөмкин.

Лабораторияларҙың адресы Башҡортостан буйынса Роспотребнадзор идаралығы сайтында бирелгән.