Яҙғы һунарсылыҡ осоронда Башҡортостанда 47 хоҡуҡ боҙоу асыҡланған

ӨФӨ, 2017 йыл, 27 апрель. /«Башинформ» мәғлүмәт агентлығы, Гөлфиә Акулова/. 22 апрелдән 1 майға тиклем Башҡортостанда яҙғы һунарсылыҡ миҙгеле асылды. Башҡортостандың Тәбиғәттән файҙаланыу һәм экология министрлығынан хәбәр итеүҙәренсә, был ваҡытта ҡурпысыҡтарға, ҡыр ҡаҙҙарына (һоро ҡыр ҡаҙҙарынан башҡа), ата өйрәктәргә, һуйырҙарға, ҡорҙарға һунар рөхсәт ителә.

Ғәҙәттәгесә, яҙғы һунарсылыҡ осоронда Экология министрлығының дәүләт инспекторҙары рейдҡа сыға. Алты көн эсендә 47 хоҡуҡ боҙоу осрағы асыҡланған, шуларҙың икәүһенә енәйәт яуаплылығы янай. Әбйәлил районында һунарсылар законһыҙ рәүештә мышы, Хәйбулла районында ике ҡоралай атҡан.

Республиканың Тәбиғәттән файҙаланыу һәм экология министрлығы һунарсыларға яҙғы һунарсылыҡ осоронда ғәмәлдә булған тыйыуҙар һәм сикләүҙәр тураһында иҫкә төшөрә. Рәсәй Федерацияһының һунарсылыҡ ҡағиҙәләренә ярашлы, яҙғы һунар тик һыу ҡоштары менән урман ҡоштарына ғына рөхсәт ителә. Ҡырағай хайуандар тауышы сығарған электрон приборҙар, һыу ҡоштарын эҙәрлекләү өсөн кәмәләр ҡулланыу, ҡурпысыҡтарҙың иртәнге «тартылыу» мәлендә һунар итеү, селдәр, ҡашҡабаштар, ҡуҡыйҙар аулау тыйыла.