Баш ҡалала Кооператив яланын һыу баҫҡан: өс кеше эвакуацияланған

ӨФӨ, 2017 йыл, 26 апрель. /«Башинформ» мәғлүмәт агентлығы, Ольга Мортазина/. Өфөләге Кооператив ялан биҫтәһендә өс йорттоң ихатаһын һыу баҫҡан, тип хәбәр итә Башҡортостандың Ғәҙәттән тыш хәлдәр буйынса дәүләт комитеты. Эвакуациялауға ризалыҡ белдергән өс кеше Өфө сәнғәт институты ятағындағы ваҡытлыса тороу пунктына урынлаштырылған. «Был пункт 100 кешегә иҫәпләнгән, унда барлыҡ көнкүреш уңайлыҡтары булдырылған. Күп осраҡта граждандар үҙ йорттарын ҡалдырып китеүҙән баш тарта. Яҙғы ташҡын ҡала-райондарҙағы ташҡынға ҡаршы комиссияларҙың һәм граждандарҙың контроленә алынған», — тип билдәләнеләр Башҡортостан Республикаһының Ғәҙәттән тыш хәлдәр буйынса дәүләт комитетында.