Республиканың Күгәрсен районындағы ауылды һыу баҫҡан

ӨФӨ, 2017 йыл, 21 апрель. /«Башинформ» мәғлүмәт агентлығы, Ольга Мортазина/. Күгәрсен районында Оло Эйек йылғаһы буйында урынлашҡан Үрге Мөрсәләй ауылын һыу баҫҡан. Йылға төн уртаһында ярҙарынан сыҡҡан. Рәсәй Ғәҙәттән тыш хәлдәр министрлығының Башҡортостан буйынса баш идаралығы мәғлүмәттәренә ярашлы, туғыҙ ихата һыу аҫтында ҡалған, әлегә һыу йорттарға үтеп инмәгән. Был өйҙәрҙә 25 кеше, шул иҫәптән туғыҙ бала йәшәй. Хәҙер Оло Эйектең кимәле 226 сантиметр тәшкил итә, хәүефле кимәл — 290 сантиметр. Хәл контролгә алынған, кәрәк булған осраҡта халыҡты эвакуациялау ҡаралған, тип хәбәр иттеләр Башҡортостандың Ғәҙәттән тыш хәлдәр министрлығында.