Өфөлә Еңеү көнө уңайынан фейерверк буласаҡ

ӨФӨ, 2017 йыл, 21 апрель. /«Башинформ» мәғлүмәт агентлығы, Гөлфиә Акулова/. Өфөлә Еңеү көнө уңайынан фейерверк планлаштырылған, тип хәбәр итә ҡала хакимиәте.

Баш ҡалала төп байрам саралары 9 майҙа уҙғарыла. Иртәнге сәғәт 11-ҙә Еңеү паркында Мәңгелек утҡа һәм Тыл хеҙмәтсәндәре мемориалына сәскә һалыу тантанаһы була. Бер сәғәттән һуң «Үлемһеҙ полк» дөйөм Рәсәй гражданлыҡ-илһөйәрлек акцияһында ҡатнашыусылар Октябрь проспекты буйлап Дәүләт циркынан алып В. И. Ленин исемендәге майҙанға тиклем тантаналы марш менән үтәсәк. Йола буйынса, өфөләр туғандары — Бөйөк Ватан һуғышы һалдаттары төшөрөлгән транспаранттар менән урамға сығасаҡ.

Акция барышында юл хәрәкәте хәүефһеҙлеген тәьмин итеү маҡсатында иртәнге сәғәт 10-дан көндөҙгө 2-гә тиклем Октябрь проспектында СССР-ҙың 50 йыллығы урамынан алып Дан бульварына хәтлем транспорт хәрәкәте ябыла. Еңеү көнөн байрам итеү киске сәғәт 10-да Ленин исемендәге майҙанда сағыу фейерверк менән тамамлана.