Беҙгә балалар кәрәк һәм ЭКО-ға бушлай квоталар күләмен кәметергә ниәтебеҙ юҡ – Башҡортостан Башлығы

ӨФӨ, 2017 йыл, 14 апрель. /«Башинформ» мәғлүмәт агентлығы, Гөлфиә Акулова/. Төбәктә тыуымды арттырыу зарур, беҙгә балалар кәрәк, киләсәктә мотлаҡ медицина страховкалау полисы иҫәбенә экстракорпораль аталандырыу процедураларын ғәмәлгә ашырыу өсөн квоталар күләмен кәметергә ниәтебеҙ юҡ, тип белдерҙе Рөстәм Хәмитов, быйыл ошо исемлекә инмәүе өсөн борсолған ҡатын-ҡыҙҙың һорауына яуап биреп. «Сиратта торғандар квота менән алдағы йылдарҙа файҙалана аласаҡ», — тип ышандырҙы төбәк Башлығы.

Квоталарҙың иҫәбе йылдан-йыл арта, әгәр элек бындай процедураны түлһеҙлек менән интеккән 150-200 ҡатын ғына бушлай эшләтә алһа, быйыл мотлаҡ медицина страховкалау полисы иҫәбенә Башҡортостандан 1,5 мең ҡатын-ҡыҙ ЭКО процедураһын яһатасаҡ. Рөстәм Хәмитов фекеренсә, ошо сара республикала тыуымды арттырырға мөмкинлек бирәсәк. Башҡортостан Һаулыҡ һаҡлау министрлығының һуңғы мәғлүмәттәре буйынса, әлеге ваҡытта республикала 2,7 мең ҡатын-ҡыҙ ЭКО-ға сиратта тора.