Республикала Экология йылында экологик туризмды тағы ла нығыраҡ үҫтерергә ниәтләнәләр

ӨФӨ, 2017 йыл, 13 апрель. /«Башинформ» мәғлүмәт агентлығы, Гөлфиә Акулова/. Башҡортостанда Экология һәм айырым һаҡланған тәбиғәт биләмәләре йылында экологик туризм үҙ үҫеше өсөн яңы этәргес көс алырға тейеш, тип хәбәр итте төбәктең тәбиғәттән файҙаланыу һәм экология министры Илдар Һаҙыев. Уның әйтеүе буйынса, республика үҙенсәлекле тәбиғи мираҫҡа эйә һәм уны һаҡлап ҡалыу менән бер рәттән ошо биләмәләрҙе үҫтереү бурысы тора.

Башҡортостанда Экологик туризм «Ирәмәл», «Мораҙым тарлауығы» тәбиғәт парктарында тәҡдим ителгән. Ошо айырым һаҡланған тәбиғәт биләмәләрендә булған экологик маршруттар һәм һуҡмаҡтар буйынса йыл һайын 30 меңдән ашыу турист-спелеолог, шулай уҡ тау түбәләрен үҙ итеүселәр уҙа. «Ирәмәл» тәбиғәт паркы биләмәһендә «Урал батыр» башҡорт халыҡ эпосы мотивтары буйынса һалынған яңы экологик-мәҙәни маршрут туристик мөхиттә ҙур популярлыҡ яуланы. Рәсәй ҡурсаулыҡ системаһының 100 йыллығында республиканың айырым һаҡланған тәбиғәт биләмәләре майҙанын арттырыу күҙаллана. «Еҙем» тәбиғәт паркын булдырыу буйынса эштәр бара, төбәктең тәбиғи объекттарының береһенә ЮНЕСКО эгидаһы аҫтында геопарк исеме биреләсәк.

«Экологик туризм тәбиғи һәм мәҙәни мираҫты һаҡлап ҡалыу маҡсаттарына тап килә, экосистемаға кире йоғонтоно бөтөрә, — тип билдәләне Рәсәй Федереацияһы Президенты ҡарамағындағы Стратегик үҫеш һәм өҫтөнлөклө проекттар буйынса совет президиумы ултырышында Рәсәйҙең тәбиғәт ресурстары һәм экология министры Сергей Донской. — Үҙендә илдең матурлығын һәм бөйөклөгөн сағылдырған биләмәләр ҡунаҡ һәм туристик инфраструктураларҙың булмауы сәбәпле граждандарға күренмәй ҡала, шул уҡ ваҡытта, мәҫәлән: Америка Ҡушма Штаттарының ҡурсаулыҡ биләмәләренә йылына 100-280 миллион кеше йөрөй, шуның менән уларҙың үҫешенә миллиард долларҙар туплана».

Башҡортостан Экология министрлығында хәбәр итеүҙәренсә, 6-8 июндә Өфөлә уҙасаҡ «Экология. Технологиялар. Тормош» халыҡ-ара экологик форумында айырым һаҡланған тәбиғәт биләмәләре һәм экологик туризм төп тема буласаҡ. Өлкәнең алдынғы белгестәре, Рәсәй субъекттары вәкилдәре, ғилем һәм йәмәғәт эшмәкәрҙәре Рәсәй ҡурсаулыҡ системаһының хәлен, хәҙерге тенденцияларҙы һәм перспективаларҙы тикшерәсәк.