Өфөлә теләге булғандарҙы башҡорт теленән төбәк диктантын яҙырға саҡыралар

ӨФӨ, 2017 йыл, 13 апрель. /«Башинформ» мәғлүмәт агентлығы, Эльмира Сабирова/. 22 апрелдә теләге булған һәр кемде башҡорт теле буйынса төбәк диктантын яҙырға саҡыралар. Сара бер үк ваҡытта Башҡорт дәүләт университетының төп корпусында, уның институттарында, филиалдарында, шулай уҡ Өфө, Бөрө, Салауат, Сибай, Стәрлетамаҡ, Нефтекама, Белорет, Ишембай, Мәләүез, Учалы ҡалаларындағы дөйөм белем биреү мәктәптәрендә һәм күрше төбәктәрҙә ойошторола. Диктант иртәнге сәғәт 10-да башлана.

Башҡорт дәүләт университетының башҡорт филологияһы һәм журналистика факультетында хәбәр итеүҙәренсә, әлегә быйыл тексты кем уҡыясағы тикшерелә. Үткән йылдарҙа уны Рәсәйҙең һәм Башҡортостандың халыҡ артисы, Салауат Юлаев исемендәге премия лауреаты, Мәжит Ғафури исемендәге Башҡорт дәүләт драма театры актеры, бик күп классик һәм хәҙерге пьесаларҙы башҡорт теленә тәржемәләгән Хөрмәтулла Үтәшев һәм диктор, Башҡортостандың халыҡ артисы Әхәт Мортазин уҡыны.

Башҡорт теленән төбәк диктанты тәүге тапҡыр 2015 йылдың апрелендә уҙғарылғайны. Идея авторы — билдәле журналист Рәшиҙә Мәһәҙиева. Быйыл да белемдәрен тикшерергә теләүселәр күп булыр тип көтөлә.

Әлеге акция һәр ваҡыттағыса ҡыҙыҡһыныу тыуҙыра. Күптәр туған телендә ни тиклем дөрөҫ һөйләшеүҙәрен һәм яҙыуҙарын тикшерергә, йәнле нәфис телмәрҙе ишетергә теләй. Шуға күрә ошондай сараларҙы хупларға кәрәк, тип иҫәпләй диктант инициаторҙары — БДУ-ның башҡорт филологияһы һәм журналистика факультеты.