Дәүләт Думаһында сәйер исемдәрҙе тыйыу тураһындағы закон проектына төҙәтмәләр хупланды

ӨФӨ, 2017 йыл, 12 апрель. /«Башинформ» мәғлүмәт агентлығы, Ольга Мортазина/. Дәүләт Думаһы депутаттары сәйер исемдәрҙе тыйыу тураһындағы закон проектына төҙәтмәләр индереү тәҡдимен хупланы, тип хәбәр итә федераль киң мәғлүмәт саралары. Дефистар һәм аббревиатуралар тыйылмай. Исемдәрҙә һүгенеү һүҙҙәре, рангтар, титулдар, вазифалар, һандар, символдар, хәрефле-һанлы кодтар булырға тейеш түгел. Ата-әсәләр балаларына икеһенең дә фамилияһын бирә ала.

Сәйер исемдәрҙе тыйыу тураһындағы закон проекты 2017 йылдың мартында тәүге уҡыуҙа ҡабул ителде. Инициатива авторы, сенатор Валентина Петренко уйынса, документ бала өсөн исем һайлағанда ул «уның шәхси мәнфәғәттәрен боҙмаһын өсөн» ата-әсәләрҙе сикләргә тейеш.