Башҡортостанда ҡулланыусылар хоҡуҡтарын яҡлау хеҙмәте вакцина профилактикаһы һорауҙары буйынса ҡыҙыу линия асты

ӨФӨ, 2017 йыл, 11 апрель. /«Башинформ» мәғлүмәт агентлығы, Эльмира Сабирова/. Ҡулланыусылар хоҡуғын һәм кеше именлеген яҡлау өлкәһендәге күҙәтеү буйынса федераль хеҙмәттең Башҡортостан буйынса идаралығы йоғошло ауырыуҙарға иммунопрофилактика һорауҙары буйынса ҡыҙыу линия асты. 10 апрелдән 24-нә ҡәҙәр иртәнге сәғәт 10-дан көндөҙгө 4-кә тиклем 8-800-100-47-67 телефоны буйынса ведомство белгестәре мөрәжәғәт иткәндәргә йоғошло ауырыуҙарға ҡаршы вакцинация, инфекция йоҡтороу хәүефе һәм эҙемтәләре, был ауырыуҙарҙан шәхси һәм йәмәғәт профилактика саралары, милли прививкалар календары һорауҙары буйынса консультация бирәсәк.

Эпидемиологтар ни өсөн балаларға прививка яһау, сит илдәргә барғанда ниндәй профилактик прививкалар эшләтеү кәрәклеген һәм унда ял иткәндә ниндәй йоғошло ауырыуҙар көткәнен аңлатасаҡ.

Милли прививкалар календарына 10-дан ашыу йоғошло ауырыуға: туберкулез, вируслы В гепатиты, дифтерия, һын ҡатыу ауырыуы, быума йүтәл, полиомиелит, ҡыҙылса, эпидемик паротит, ҡыҙамыҡ, грипп һәм башҡаларға ҡаршы бушлай вакцинация инә.