Башҡорт дәүләт медицина университеты Рәсәйҙең медицина һәм фармацевтика өлкәһендәге премияһы менән билдәләнде

ӨФӨ, 2017 йыл, 10 апрель. /«Башинформ» мәғлүмәт агентлығы, Эльмира Сабирова/. Башҡорт дәүләт медицина университеты Рәсәйҙең медицина һәм фармацевтика өлкәһендәге йыллыҡ премияһына лайыҡ булды. «Белем биреү программалары уҡыу-методик ҡулланмаһының иң яҡшы тәжрибәһе өсөн» премияһының 2016 йылғы лауреаты тип БДМУ ректоры, Рәсәй Фәндәр академияһының ағза-корреспонденты, профессор Валентин Павлов етәкселегендәге авторҙар коллективы танылды.

Юғары уҡыу йортоноң матбуғат үҙәгендә аңлатыуҙарынса, премияға Башҡорт дәүләт медицина университетының «Роснано» менән берлектә әҙерләгән ядро медицинаһы өлкәһендә һөнәри ҡайтанан әҙерләү пилот белем биреү программаһы лайыҡ булған. Ул ошо өлкәлә эшләгән белгестәрҙе комплекслы әҙерләүҙе үҙ эсенә ала. Һүҙ позитрон-эмиссион томография һәм радиохирургия үҙәктәрендәге табип-рентгенологтар, радиологтар, радиохимиктар, провизор-аналитиктар, физиктар, медицина физиктары, баш табиптар һәм баш шәфҡәт туташтары, идара итеүсе персонал хаҡында бара.

Лауреаттар Мәскәүҙә VII «Медицина мәғарифы аҙналығы-2017» дөйөм Рәсәй конференцияһы барышында бүләкләнде.