Төбәк һәм муниципаль телеканалдарына социаль селтәрҙәргә әүҙемерәк инергә кәрәк - эксперт

ӨФӨ, 2017 йыл, 6 апрель. /«Башинформ» мәғлүмәт агентлығы, Ғәлиә Нәбиева/. Аудитория күпләп интернетҡа китә, тулыһынса тиерлек мәғлүмәтте интернет аша ала. Шуға төбәк һәм муниципаль телеканалдарына социаль селтәрҙәргә әүҙемерәк инергә кәрәк. Ошондай ҡарашын белдерҙе Дөйөм Рәсәй халыҡ фронтының Башҡортостандағы төбәк штабы ағзаһы, «Вся Уфа» телеканалы директоры Алина Сөләймәнова төбәк телевидениеһы мәсьәләләренә арналған «Дөрөҫлөк һәм ғәҙеллек» дөйөм халыҡ фронты медиафорумы майҙансығында.

«Етештереүсе ҡаласаҡ, әммә контентты илтеү ҡоралдары үҙгәрергә тейеш. Һәм улар үҙгәрә, өҫтәүенә бик тиҙ. Сөнки «Бәйләнештә» һәм «Фейсбук» кеүек билдәле платформалар ҙа икенсе планға күсә. «Твитч» кеүек яңылары сыға, унда ғәҙәти булмаған постар ҡулланыла: контент онлайн-стримдар иҫәбенә илтеп бирелә. Шул рәүешлә канал популяр булып китә», — тип билдәләне Алина Сөләймәнова.

Уның әйтеүе буйынса, мәғлүмәт ҡулланыусыһы өсөн көрәшкә муниципаль һәм төбәк телеканалдары ла ҡушылырға тейеш. «Улар мобиль һәм аныҡ тамашасы ихтыяжына яҡын, — тип аңлатма бирҙе Дөйөм Рәсәй халыҡ фронты белгесе. — Йыл ярым элек телеканалыбыҙ тулыһынса үҙгәреш алды. Нәҡ шул ваҡыттан беҙ социаль медиаларға инә башланыҡ. Беҙҙең күрһәткестәр нулдән алып социаль селтәрҙә иң күп яҙылыусылар иҫәбе менән бөтөн илдең миллионлы ҡалаларының төбәк компаниялары араһындағы Топ-25 исемлегенә ҡәҙәр үҫте».

Социаль селтәрҙәр менән эш мәжбүри түгел, уны финансларға кәрәкмәй, әммә ул бик мөһим, тип һыҙыҡ өҫтөнә алдына белгес. Сөнки был йәш аудитория өсөн мәғлүмәт илтеп биреү алымы.