Башҡортостанда Ғәҙәттән тыш хәлдәр министрлығы дауыллы ел хаҡында иҫкәртә

ӨФӨ, 2017 йыл, 6 апрель. /«Башинформ» мәғлүмәт агентлығы, Ксения Калинина/. Башҡортостанда Ғәҙәттән тыш хәлдәр министрлығы дауыллы ел хаҡында иҫкәртә. 6 апрелдә төбәктә аяҙлы-болотло һауа торошо көтөлә, тип хәбәр итә Рәсәй Ғәҙәттән тыш хәлдәр министрлығының Башҡортостан буйынса баш идаралығы, республиканың гидрометеорология һәм тирә-яҡ мөхит мониторингы идаралығы мәғлүмәттәренә һылтанып. Төндә урыны менән бер аҙ епшек ҡар яуасаҡ, юлдарҙа еңелсә боҙлауыҡ буласаҡ, көндөҙ – яуым-төшөмһөҙ. Ел көнбайыштан, көньяҡ-көнбайыштан секундына 7-12 метр. Ҡапыл иҫкәндә секундына 15-20 метрғаса етеүе мөмкин. Һауа температураһы төндә -2,-7 градус, аяҙытҡанда -12, көндөҙ +2,+7 тәшкил итәсәк.

Төндә һәм иртәнсәк юлдарҙың ҡайһы бер участкаларында томан төшөүе фаразлана, күреү мөмкинлеге 500-1000 метрҙан насараясаҡ, тип хәбәр итә ҡотҡарыусылар.

Ғәҙәттән тыш хәлдәр министрлығы граждандарға электр линиялары, ағастар һәм реклама таҡталары тирәһенән алыҫыраҡ йөрөргә кәңәш итә.

«Йәйәүлеләр, урамда һәм юл аша сыҡҡанда иғтибарлы булығыҙ. Водителдәрҙең тиҙлек режимын кәметеүҙәре һорала. Юлдарҙа иғтибарлы һәм һаҡ булығыҙ. Электр тапшырыу линиялары аҫтында тороу һәм өҙөлгән электр сымдарына яҡын барыу ғүмер өсөн хәүефле», — тип билдәләнеләр ведомствола.

Дауыл осоронда электр селтәрҙәре һәм ҡорамалдарҙың, йәшәгән йорттарҙа йылытыу мейестәренең торошон тикшерергә, эске һәм тышҡы янғынға ҡаршы һыу тәьминәтенең, телефон элемтәһенең төҙөклөгөн булдырырға, янғынға ҡаршы кәрәкле инвентарҙы әҙерләргә кәңәш ителә.