Башҡортостан Фәндәр академияһы һәм Мәскәү дәүләт университеты Хеҙмәттәшлек тураһында килешеү төҙөргә ниәтләнә

ӨФӨ, 2017 йыл, 5 апрель. /«Башинформ» мәғлүмәт агентлығы, Әлим Фәйезов/. Башҡортостан Фәндәр академияһы һәм М.В. Ломоносов исемендәге Мәскәү дәүләт университеты Хеҙмәттәшлек тураһындағы килешеүгә ҡул ҡуясаҡ. Мәскәүҙә Башҡортостан Фәндәр академияһы президенты Әлфис Ғаязов менән Мәскәү дәүләт университеты ректоры Виктор Садовничейҙың осрашыуы барышында ошо хаҡта һөйләшеп килешелде. Осрашыуҙа шулай уҡ Башҡортостан Республикаһының Рәсәй Федерацияһы Президенты ҡарамағындағы тулы хоҡуҡлы вәкиле Артур Шәйнуров һәм Башҡорт дәүләт университеты ректоры Николай Морозкин ҡатнашты.

Әлфис Ғаязов шулай уҡ Дәүләт Думаһының Мәғариф һәм фән буйынса комитеты рәйесенең беренсе урынбаҫары, медицина фәндәре докторы, профессор, Рәсәй Фәндәр академияһы академигы Геннадий Онищенко менән осрашты.

Ошо осрашыуҙар барышында «Фән һәм дәүләт ғилми-техник сәйәсәте тураһында»ғы Федераль Закон проектының Рәсәй Федерацияһы субъекттары әҙерләгән фәндәр академияларының хоҡуҡи статусына, төбәк фәндәр академиялары эшмәкәрлегенә төҙәтмәләр индереү, Рәсәй Фәндәр академияһының Башҡортостан Фәндәр академияһы, республиканың ғилми һәм белем биреү ойошмалары менән хеҙмәттәшлекте артабан үҫтереү мәсьәләләре ҡуҙғатылды, тип хәбәр иттеләр Башҡортостан Фәндәр академияһында.