Республикала йәшәүселәрҙе Рәсәй кимәлендәге экологик квеста ҡатнашырға саҡыралар

ӨФӨ, 2017 йыл, 3 апрель. /«Башинформ» мәғлүмәт агентлығы, Гөлфиә Акулова/. Башҡортостан халҡын Бөтә Рәсәй экологик уйынында ҡатнашырға саҡыралар. Экология йылы сиктәрендә Рәсәй Йәмәғәт палатаһы «Изге эштәр марафоны» экологик акцияһына старт бирҙе. Ойоштороусылар фекеренсә, проект рәсәйҙәрҙә социаль яуаплы тәртип булдырыуға йүнәлтелгән.

Ҡатнашыусыларға биш этапты үтергә кәрәк: «Үҙеңдән башла», «Ярҙам ит», «Тупла», «Аң-белем тарат» һәм «Донъяны үҙгәрт». Һәр этап бер нисә эште үҙ эсенә ала, мәҫәлән, өйҙә батарейкалар йыйыу пунктын ойошторорға мөмкин. Ҡатнашыусылар эштәрҙе үтәгән өсөн киләһе этаптарға үтергә һәм еңеүгә яҡынлашырға мөмкинлек биргән мәрәйҙәр ала. Акцияның сайтында ҡатнашыусыларҙың, иң изге ҡалаларҙың һәм мәктәптәрҙең рейтингы алып барыласаҡ. Әүҙемселәрҙең иң яҡшы проекттары «Иң яҡшы экологик тәжрибәләр банкы»на индерелә.

Рәсәйҙәр һәм йәмәғәт ойошмалары ҡабул итеү пункттары картаһын төҙөүҙә лә әүҙем ҡатнаша ала. Тиҙҙән экологик отрядтар эшләй башлай, картаны төҙөүҙә ҡатнашҡан рәсәйҙәргә унда инергә тәҡдим ителә, сайтта яҙылырға мөмкин. Күп фатирлы йорттарҙа йәшәүселәр өсөн инструкция төҙөлгән, унда идара итеүсе компаниянан хәүефле ҡалдыҡтарҙы йыйыу пункттарын булдырыуға нисек өлгәшергә икәнлеге ентекле яҙылған.