Өфөлә һыу баҫыу ихтималлығы булған урындарҙа иҫкәртеү рейдтары уҙғарыла

ӨФӨ, 2017 йыл, 30 март. /«Башинформ» мәғлүмәт агентлығы, Галина Бахшиева/. Республиканың баш ҡалаһында һыу баҫыу ихтималлығы булған урындарҙа иҫкәртеү рейдтары уҙғарыла. Һүҙ тәү сиратта Затон, Нижегородка, Кооператив ялан, Кузнецов затоны, Максимовка, шулай уҡ Дим районының баҡсасылыҡ ширҡәттәре хаҡында бара.

Өфө хакимиәтенең матбуғат хеҙмәтендә хәбәр итеүҙәренсә, рейдтар барышында 696 торлаҡ һәм 79 баҡса йорттары тикшерелгән. Йорт хужаларына һыу баҫыу ихтималлығы булған ерҙән эвакуациялау ҡағиҙәләре яҙылған листовкалар таратылған. Бөтәһе 1800-гә яҡын кешегә инструкция үткәрелгән.

«Алдан көнкүреш техникаһын, йорт йыһаздарын, кейем-һалымды, аҙыҡ-түлекте, умарталарҙы, йорт хайуандарын, ҡош-ҡортто хәүефһеҙ урынға сығарырға кәрәк. Бынан тыш, һыу үткәрмәй торған материалға төрөп, аҙыҡ-түлек һәм дарыуҙар запасын әҙерләү, шулай уҡ ғаилә ағзалары менән торлаҡты ҡалдырып киткәндә ниндәй саралар күрергә кәрәклеге тураһында әңгәмә уҙғарыу зарур», — тип һөйләне Ленин районы буйынса янғынды иҫкәртеү бүлеге начальнигы Алмаз Әхмәев.

Янғын һағы хеҙмәткәрҙәре яҙғы ташҡын осоронда балаларға айырыуса ҙур иғтибар бүлергә тәҡдим итә. Һыу ятҡылыҡтары янында уйнауҙы тыйырға һәм өй шарттарында, урамда хәүефһеҙлек ҡағиҙәләрен үтәү тураһында даими әңгәмә үткәрергә кәрәк.

Белгестәр ашығыс хеҙмәттәрҙең, шулай уҡ туғандарҙың адресы, телефон номерҙары яҙылған ҡағыҙҙы күренеп торған урынға ҡуйырға кәңәш бирә.