Өфөлә һыу баҫыу зонаһына ингән райондарҙың исемлеге төҙөлдө

ӨФӨ, 2017 йыл, 24 март. /«Башинформ» мәғлүмәт агентлығы, Ольга Мортазина/. Башҡортостандың Ғәҙәттән тыш хәлдәр буйынса дәүләт комитеты Өфөнөң һыу баҫыу зонаһына ингән биҫтәләре исемлеген төҙөнө. Исемлек һыу кимәленең күтәрелеүенә ярашлы төҙөлгән. Мәҫәлән, яҙ һайын Ағиҙелдең иҫке үҙәне ташыу һөҙөмтәһендә Козарез ҡасабаһына юлды һыу баҫа — бының өсөн һыу кимәленең 500 сантиметрға күтәрелеүе лә етә. Әгәр ул 900 сантиметрға күтәрелһә, Кооператив ялан биҫтәһендәге 524 йорт, шул иҫәптән 34-се мәктәп һәм поликлиника биләмәһе һыу аҫтында ҡаласаҡ.

Ҡариҙел йылғаһының 750 сантиметрға тиклем күтәрелеүе Калинин районындағы «Йылға таңдары» профилакторийына юлды ябасаҡ. 950 сантиметрға етһә, Шакша, Максимовка, Инорс биҫтәләрендә йәшәгән 865 кешегә хәүеф янай.

Иҫегеҙгә төшөрәбеҙ, уҙған йылда Ағиҙелдә ташҡын 25 апрелдә иң юғары кимәленә – 756 сантиметрға етте. Өфө йылғаһында иң юғары күрһәткес 24 апрелдә теркәлде – 769 сантиметр. Был һандар фараздарға тап килде: Ағиҙелдә максималь кимәл – 730-830 сантиметр, Ҡариҙелдә 760-860 сантиметр булыр тип көтөлгәйне.

Былтыр Ағиҙелдә боҙ аҙна-ун көнгә алдараҡ — 3 апрелдә китә башланы. Ағымдағы йылғы ташҡынға прогноз 27 мартта билдәле буласаҡ, тип хәбәр иттеләр Башгидрометта.