«Башавтотранс»тың төнгө рейсты туҡтатыуы тураһында ҡарары Өфө аэропорты өсөн көтөлмәгән бүләк булды

ӨФӨ, 2017 йыл, 13 март. /«Башинформ» мәғлүмәт агентлығы, Ксения Калинина/. Өфөлә «Башавтотранс» дәүләт унитар предприятиеһының 101к ҡала яны автобусының төнгө маршруты ябыла. Күп кеше һыйҙырышлы «НефАЗ» маркалы автобус «Өфө» аэропортынан Көньяҡ автовокзалға тиклем пассажирҙар йөрөтә. Автовокзалдан транспорт төнгө сәғәт 12-лә һәм 3-тә, аэропорттың касса пунктынан төнгө сәғәт 2-cе яртыла һәм 5-cе яртыла юлға сыға. Рейстар автопредприятие өсөн файҙаһыҙ булып сыҡҡан.

«Был беҙҙең өсөн көтөлмәгән бүләк булды, — тип һөйләне Өфө аэропортының матбуғат хеҙмәте етәксеһе Татьяна Ризван. — «Башавтотранс» беҙҙе лә, пассажирҙарҙы ла иҫкәртмәне. Беҙ ошо хаҡта киң мәғлүмәт сараларынан белдек. Уҙған йома көндө генә «Башавтотранс»ҡа пассажирҙар ағымының артыуын көтөүебеҙ, һәм дүртенсе йышлыҡты асыуҙарын һорап хат яҙғайныҡ. Йәғни автобус аэропортҡа өс тапҡыр килә ине, беҙ иһә пассажирҙарҙы күберәк йәлеп итеү өсөн дүрт апҡыр килеүен һораныҡ. Шулай уҡ рейсҡа ҙур «НефАЗ»дарҙы түгел, 20 кешегә иҫәпләнгән Mercedes-Benz Sprinter маркалы автобустарҙы сығарыуҙарын үтендек. Беҙҙең мәғлүмәттәр буйынса, рейста 15-20 кеше йөрөй торғайны».

«Башавтотранс» дәүләт унитар предприятиеһының пассажирҙар йөрөтөү буйынса генераль директор урынбаҫары Сергей Паскин һүҙҙәренсә, маршрут әлегә ябылмаған.

«Беҙ пассажирҙарға ошо хаҡта 10 көн алдан хәбәр итәбеҙ. Маршрутҡа һорау ҙур түгел. Төндә пассажирҙар был хеҙмәт менән файҙаланһа ла, беҙҙе ҡәнәғәтләндерерлек кимәлдә түгел. Һорау алыу һәм күҙәтеүҙәребеҙ буйынса, республиканың баш ҡалаһына килгән кешеләр башҡа транспорт төрө, шул иҫәптән такси һәм шәхси автомобилдәр менән файҙалана. Пассажирҙарҙың бик аҙы ғына беҙҙең хеҙмәттәргә мөрәжәғәт итә. Ошондай ҡиммәтле автобусты файҙаһыҙ маршрутта тотоуҙы иҡтисади яҡтан дөрөҫ түгел тип иҫәпләйем. Рейстарҙы ябыуҙың сәбәбе шунда», — тип аңлатма бирҙе «Башинформ» агентлығына дәүләт предприятиеһы хеҙмәткәре.

Төнгө маршрут быйыл 20 мартта ябыла. Алдан хәбәр ителгәнсә, 30 ғинуарҙан 31-нә ҡарай төндә «Башавтотранс» предприятиеһы Өфөлә «Көньяҡ автовокзал — Аэропорт» 101к маршруты буйынса автобустар хәрәкәтен тергеҙгәйне.

Иҡтисад фәндәре докторы, Башҡорт дәүләт университеты Иҡтисад, финанс һәм бизнес институтының «Макроиҡтисади үҫеш һәм дәүләт идара итеүе» кафедраһы мөдире Азат Йәнгиров фекеренсә, әгәр ошондай автобус рейстары булмаһа, был инвесторҙар өсөн Башҡортостандың баш ҡалаһының әһәмиәтен һәм йәлеп итеүсәнлеген ниндәйҙер кимәлдә кәметәсәк.