Өфө юлдарының торошо - «Рәсәй радиоһы – Башҡортостан»да «Ирекле микрофон» тапшырыуының сираттағы әңгәмә темаһы

ӨФӨ, 2017 йыл, 9 март. /«Башинформ» мәғлүмәт агентлығы, Әлим Фәйезов/. «Рәсәй радиоһы – Башҡортостан»да «Азамат Сәйетов менән ирекле микрофон» тапшырыуының сираттағы ҡунағы – Өфө хакимиәте башлығының беренсе урынбаҫары Салауат Хөсәйенов. Мультимедия проекты студияһында әңгәмә Өфө автомобиль юлдарының торошона арналған.

«Ҡыҙғанысҡа ҡаршы, ошо тема йылдан-йыл бөтә киң мәғлүмәт саралары өсөн мәжбүри булып бара, — тип билдәләне «Ирекле микрофон» авторы һәм алып барыусыһы Азамат Сәйетов. – Әлеге ваҡытҡа тиклем үҙгәрештәр күҙәтелмәне: халыҡ асыуланды, юл һәм коммуналь хеҙмәттәр үҙ хаталары өсөн аҡланырға тырышты, йәки бындай хәл башҡа килеп сыҡмаясаҡ тип вәғәҙә биреп маташты. Әммә Өфө власы эшләрҙәй ысулдар тапты, ахырыһы. Һәр хәлдә быға бик ышанғы килә».

«Рәсәй радиоһы – Башҡортостан»да тура эфир 89.5 FM йышлығында 9 мартта киске етенсе 25 минутта сыға. Радио тыңлаусылар 8(347)272-85-47 телефоны буйынса шылтыратып, әңгәмәгә ҡушыла ала.

Радиотапшырыуҙың телевизион версияһын 15 мартта киске сәғәт 7-лә «Рәсәй 24. Башҡортостан» телеканалында ҡарарға мөмкин.

«Азамат Сәйетов менән ирекле микрофон» тапшырыуҙарының архивы «Башҡортостан» дәүләт телерадиокомпанияһының рәсми сайтында урынлаштырылған.