Өфөлә ҡаланың иң күренекле ҡатын-ҡыҙҙарын бүләкләнеләр

ӨФӨ, 2017 йыл, 9 март. /«Башинформ» мәғлүмәт агентлығы, Ғәлиә Нәбиева/. Өфө хакимиәте Халыҡ-ара ҡатын-ҡыҙҙар көнө алдынан ҡаланың социаль-иҡтисади үҫешенә тос өлөш индергән күренекле ҡатын-ҡыҙҙарҙы ҡотланы. Байрам тантанаһы «Sheraton» отелендә уҙҙы. Һәр гүзәл зат ҡала Советы һәм хакимиәтенән бүләк һәм рәхмәт хаты алды.

Бүләкләнеүселәр араһында Бөйөк Ватан һуғышында ҡатнашыусылар, фән, мәҙәниәт, мәғариф хеҙмәткәрҙәре, йәмәғәт эшмәкәрҙәре бар. Күптәрҙең исеме Өфө ҡалаһы халҡына ғына түгел, унан алыҫта ла яҡшы таныш.

Билдәле актриса һәм режиссер, РСФСР-ҙың халыҡ артисы, Өфөнөң Почетлы гражданины Гөлли Мөбәрәкова, башҡорт эстрадаһының атаҡлы артисы Нәзифә Ҡадирова, Башҡортостан Ҡатын-ҡыҙҙар союзы рәйесе Рәшиҙә Солтанова, башҡорт теле белгесе, профессор, йәмәғәт һәм дәүләт эшмәкәре Фирҙәүес Хисаметдинова, талантлы педагог һәм йырсы, Өфө ҡалаһының Почетлы гражданины Миләүшә Мортазина, РСФСР-ҙың атҡаҙанған табибы Рәйсә Мәһәҙиева, Рәсәй Федерацияһының атҡаҙанған табибы Лена Карамова, һуғышта ҡатнашыусы Александра Абакумова, медицина фәндәре докторы Наталья Егорова һәм Өфөнөң башҡа билдәле ҡатын-ҡыҙҙары бүләкләнде.

«Ҡаһарманлыҡ эшләү ҡатын-ҡыҙ эше түгел һымаҡ күренә. Әммә һеҙ беҙгә, ирҙәргә, өлгө күрһәтеп, беҙҙе тағы ла юғарыраҡ үрҙәргә дәртләндерәһегеҙ. Һеҙҙең менән күптән инде ғаиләләрегеҙ генә түгел, ҡаланың байтаҡ халҡы ғорурлана», — тине ҡала Советы рәйесе Валерий Трофимов, Өфөнөң бөтә депутаттар корпусы исеменән ҡатын-ҡыҙҙарҙы ҡотлап.