БДУ студенттары – Мәскәү дәүләт университеты конкурсында иң яҡшы эш авторҙары иҫәбендә

ӨФӨ, 2017 йыл, 9 март. /«Башинформ» мәғлүмәт агентлығы, Эльмира Сабирова/. Башҡорт дәүләт университетының Иҡтисад, финанс һәм бизнес институты студенттары М.В. Ломоносов исемендәге Мәскәү дәүләт университетының Мәскәү иҡтисад мәктәбе конкурсының тәүге турында иң яҡшы эш авторҙары иҫәбенә инде. Башҡорт дәүләт университетының матбуғат үҙәгендә аңлатыуҙарынса, дүртенсе курс студенты Тимур Хәлимов призер булды, уның курсташы Гүзәл Сәрүәрова – финалсы. Беренсе тур эшендә «Социаль тигеҙһеҙлек нисек билдәләнә?», «Уны булдырыу факторҙары ниндәй?», «Рәсәйҙә социаль тигеҙһеҙлек юғарымы?», «Улар менән көрәшергә кәрәкме?», «Әгәр эйе булһа, ниндәй саралар менән?» тигән һорауҙарға яуап биреү булды.

Конкурста еңеүсе төп бүләккә – Мәскәү дәүләт университетының Мәскәү иҡтисад мәктәбендә «Иҡтисад теорияһы һәм заманса Рәсәй проблемалары» йүнәлеше буйынса магистратурала уҡыуға Олег Дерипасканың «Иркен Эш» фондының ике йыллыҡ грантына лайыҡ буласаҡ.

Башҡорт дәүләт университеты студенттары был конкурста бер нисә тапҡыр иң яҡшы эш авторҙары булды.