Башҡортостанда халыҡҡа ташҡын тураһында сиркәү ҡыңғырауҙары хәбәр итәсәк

ӨФӨ, 2017 йыл, 9 март. /«Башинформ» мәғлүмәт агентлығы, Ксения Калинина/. Башҡортостанда халыҡҡа ташҡын тураһында сиркәү ҡыңғырауҙары хәбәр итәсәк. Рус православие сиркәүенең Өфө епархияһы һәм Башҡортостандың Ғәҙәттән тыш хәлдәр буйынса дәүләт комитеты етәкселәре хеҙмәттәшлек тураһында килешеүгә ҡул ҡуйҙы. Документ ғәҙәттән тыш хәлдәр килеп тыуған осраҡта халыҡтың һәм биләмәләрҙең хәүефһеҙлеген тәьмин итеү өлкәһендә үҙ-ара килешеп эш итеүҙе ойоштороуҙы күҙ уңында тота.

Ташҡынға әҙерлек осоронда халыҡҡа һыу баҫыу хәүефе янауы тураһында хәбәр итеү мөһим мәсьәлә булып тора. Ҡул ҡуйылған документ сиктәрендә Дәүләт комитеты сиркәү ҡыңғырауҙарын файҙаланырға тәҡдим итте. Был ҡайһы бер муниципаль райондарҙа ғәҙәти хәбәр итеү алымдарының (SMS-хәбәрҙәр, сиреналар) төбәктә йәшәүселәрҙең барыһына ла барып етмәүе менән аңлатыла. Өфө епархияһының ярҙам ҡулы һуҙыуы күпселек халыҡҡа хәбәр еткерергә мөмкинлек бирә, тип хәбәр иттеләр ведомствоның матбуғат хеҙмәтендә.

Дәүләт комитеты Өфө епархияһына ғәҙәттән тыш хәлдәр тураһында хәбәр итергә, хәүефле зонаға инеүҙә ярҙам итергә бурыслы. Ведомство Башҡортостандың Граждандар оборонаһы һәм ғәҙәттән тыш хәлдәр буйынса уҡытыу-методик үҙәгендә ғәҙәттән тыш хәлдәрҙә эш итергә әҙер дин әһелдәрен, шәфҡәт туташтарын һәм ирекмәндәр әҙерләү менән шөғөлләнәсәк. Үҙ сиратында Өфө епархияһы зыян күреүселәргә һәм уларҙың ғаилә ағзаларына әхлаҡи һәм психологик ярҙам күрһәтә, шулай уҡ ярҙам күрһәтеү пункттарын ойоштора аласаҡ.